” ಹುಡಾ ಸರ್ಕಾರಿ ಶಾಲೆಯಲ್ಲಿ ಖಾಯಂ ಶಿಕ್ಷಕರನ್ನು ನೇಮಿಸಲು ಒತ್ತಾಯ”

ತಾಲೂಕಿನ ಹುಡಾ ಗ್ರಾಮದ ಸರ್ಕಾರಿ ಮಾದರಿಯ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಖಾಯಂ ಶಿಕ್ಷಕರ ಕೊರತೆಯಿದೆ. ಇದರಿಂದಾಗಿ ಮಕ್ಕಳು ಈ ಗ್ರಾಮದ ಶಾಲೆಯನ್ನು ತೊರೆದು ಬೇರೆಡೆಗೆ ಹೋಗುವುದನ್ನು ನಾವೆಲ್ಲರೂ ತಡೆಯಬೇಕಾಗಿದೆ. ಶಿಕ್ಷಕರು, ಪೋಷಕರು, ಪಾಲಕರು, ಎಸ್.ಡಿ.ಎಮ್.ಸಿ.ಅಧ್ಯಕ್ಷರು, ಹಾಗೂ ಉಪಾಧ್ಯಕ್ಷರು, ಸದಸ್ಯರು, ಬಿಇಒ ಕಚೇರಿಗೆ ಮುತ್ತಿಗೆ ಹಾಕುವ ಕೆಲಸ ಮಾಡುತ್ತೇವೆ ಎಂದು ಗ್ರಾಮದ ಹಿರಿಯರಾದ ತಿಮ್ಮಪ್ಪ ನಾಯಕ ಹೇಳಿದರು.

ತಾಲೂಕಿನ ಹುಡಾ ಗ್ರಾಮದ ಸರ್ಕಾರಿ ಉನ್ನತಿಕರಿಸಿದ ಹಿರಿಯ ಪ್ರಾಥಮಿಕ ಶಾಲೆಗೆ ಶಿಕ್ಷಕರ ಕೊರತೆಯಿಂದ ಬೇಷತ್ತ ಗ್ರಾಮದ ಜನರು ಇಂದು ಶಾಲೆಯ ಮುಂದೆ ಪ್ರತಿಭಟಿಸಿ ಖಾಯಂ ಶಿಕ್ಷಕರ ನೇಮಕಾತಿಗೆ ಪಟ್ಟು ಹಿಡಿದು, ನಾಲ್ಕೈದು ದಿನ ಗಡುವು ನೀಡಿದರು. 1 ರಿಂದ 10 ನೇ ತರಗತಿಯವರೆಗೆ 210 ಮಕ್ಕಳಿದ್ದು, ಒಬ್ಬ ಶಿಕ್ಷಕಿ ಹಾಗೂ ಮುಖ್ಯಗುರುಗಳಿದ್ದಾರೆ. ಬಿಟ್ಟರೆ 6 ಜನ ಅತಿಥಿ ಶಿಕ್ಷಕರಿಂದಲೇ ಪಾಠ ಪ್ರವಚನ ನಡೆಯುತ್ತಿದೆ.

ಈಗಿರುವ ಹೆಚ್ಚುವರಿ ಮುಖ್ಯಗುರುಗಳಾದ ಅಂಬಣ್ಣ ಅವರು ಸಹ ಈಗಾಗಲೇ ಮಲ್ಕಾಪುರ ಗ್ರಾಮಕ್ಕೆ ವರ್ಗಾವಣೆ ಗೊಂಡಿದ್ದಾರೆ. ಇವರು ಹೋದ ಮೇಲೆ ಬರೀ ಅತಿಥಿ ಶಿಕ್ಷಕರೊಂದೆ ಉಳಿಯುವಂತಾಗುತ್ತದೆ. ಹೀಗಾಗಿ ಅತಿಥಿ ಶಿಕ್ಷಕರ ಮೇಲೆ ಪಾಲಕರು ನಂಬಿಕೆ ಇಡದೆ ತಮ್ಮ ಮಕ್ಕಳನ್ನ ಬೇರೆಡೆಗೆ ಕಳಿಸುವಂತಹ ಕೆಲಸ ಆಗುತ್ತಿದೆ. ಹೀಗಾಗಿ ಹುಡಾ ಗ್ರಾಮದ ಶಾಲೆ ಮುಚ್ಚುವ ಹಂತಕ್ಕೆ ಬಂದರೂ ಬರಬಹುದು. ಕಾರಣ ಕಡಿಮೆಯೆಂದರೂ 4 ಜನ ಖಾಯಂ ಶಿಕ್ಷಕರನ್ನಾದರೂ ತಕ್ಷಣವೇ ನೇಮಕ ಮಾಡಿ ಮಕ್ಕಳಿಗೆ ಉನ್ನತ ಶಿಕ್ಷಣಕ್ಕೆ ಒತ್ತು ಕೊಡಬೇಕೆಂದು ಒತ್ತಾಯಿಸಿದರು.

ನಂತರ ಎಸ್.ಡಿ.ಎಮ್.ಸಿ.ಸದಸ್ಯ ಜಿಲಾನಿಪಾಷಾ ಮಾತನಾಡಿ, 270 ಸಂಖ್ಯೆಯಲ್ಲಿದ್ದ ವಿದ್ಯಾರ್ಥಿಗಳು ಈಗ 210 ಕ್ಕೆ ಬಂದಿದೆ. ಕಾರಣ ಶಾಲೆಯಲ್ಲಿ ಶಿಕ್ಷಕರ ಕೊರತೆ ಮೊದಲೆಲ್ಲ 8 ಜನ ಶಿಕ್ಷಕರಿದ್ದರು. ಅನಿವಾರ್ಯ ಕಾರಣಗಳಿಂದ ಅವರು ಟ್ರಾನ್ಸ್ಫರ್ ತೆಗೆದುಕೊಂಡು ಹೋಗಿದ್ದಾರೆ. ಉಳಿದಿದ್ದು 2 ಜನ ಶಿಕ್ಷಕರು ಮಾತ್ರ ಇವರ ಜೊತೆಗೆ 6 ಜನ ಅತಿಥಿ ಶಿಕ್ಷಕರನ್ನು ಕೊಟ್ಟಿದ್ದಾರೆ.

ಎಸ್.ಡಿಎಂಸಿಯಿಂದ ವಿರೋಧ ಮಾಡಿದ್ದೇವು ಕಾರಣ ಅತಿಥಿ ಶಿಕ್ಷಕರಿಂದ ಮಕ್ಕಳಿಗೆ ಉತ್ತಮ ಕಲಿಕೆಯಂತೂ ಆಗುವುದಿಲ್ಲ ಖಾಯಂ ಶಿಕ್ಷಕರನ್ನು ನೇಮಕ ಮಾಡಲು ಹೋರಾಟ ಮಾಡಿದರು ಸಹ ಅಧಿಕಾರಿಗಳು ಗಮನ ಹರಿಸುತ್ತಿಲ್ಲ. ಅತಿಥಿ ಶಿಕ್ಷಕರನ್ನ ಅಲ್ಲಗಳೆಯುವುದಿಲ್ಲ ಅವರ ಪ್ರತಿಭೆ ತಕ್ಕಹಾಗೆ ಪಾಠ ಮಾಡುತ್ತಿದ್ದಾರೆ. ಆದರೆ ಇಲ್ಲಿ ಇಷ್ಟು ದೊಡ್ಡ ಶಾಲೆಯಿದ್ದರು ಹಾಗೂ ಪಕ್ಕದ ಉರ್ದು ಶಾಲೆಯಲ್ಲಿ ಕೂಡ ಇದೆ ಸಮಸ್ಯೆಯಿದೆ.

ಈ ಎರಡು ಶಾಲೆಯಲ್ಲಿ ಮಕ್ಕಳ ಸಂಖ್ಯೆಗೆ ಅನುಗುಣವಾಗಿ ಖಾಯಂ ಶಿಕ್ಷಕರು ಇಲ್ಲ. ಸಂಬಂಧಪಟ್ಟ ಕ್ಷೇತ್ರ ಶಿಕ್ಷಣಾಧಿಕಾರಿಗಳು, ಬಿ.ಆರ್.ಸಿ, ಡಿಡಿಪಿಐ, ಈ ಹುಡಾ ಗ್ರಾಮದ ಮಕ್ಕಳಿಗೆ ಶಿಕ್ಷಣದ ಕೊರತೆ ನೀಗಿಸಲು ಇನ್ನೊಂದು ಮೂರ್ನಾಲ್ಕು ದಿನದಲ್ಲಿ ಎರವಲು ಶಿಕ್ಷಕರನ್ನು ಕಳಿಸಿ ಉನ್ನತ ಶಿಕ್ಷಣ ಕೊಡುವ ವ್ಯವಸ್ಥೆ ಮಾಡದೆ ಇದ್ದರೆ ಮುಂದಿನ ದಿನಗಳಲ್ಲಿ ಕ್ಷೇತ್ರ ಶಿಕ್ಷಣ ಕಾರ್ಯಾಲಯದ ಮುಂದೆ ಪ್ರತಿಭಟನೆ ಹಮ್ಮಿಕೊಳ್ಳಲಾಗುವುದೆಂದು ಎಚ್ಚರಿಕೆ ನೀಡಿದರು.

ಈ ಸಂದರ್ಭದಲ್ಲಿ: ಎಸ್.ಡಿಎಮ್.ಸಿ.ಅಧ್ಯಕ್ಷ ಸಣ್ಣೆಪ್ಪ ಆಚಾರಿ, ಉಪಾಧ್ಯಕ್ಷ ಜಹೀರ್ ಪಾಷಾ, ಮಾಜಿ ಗ್ರಾ.ಪಂ.ಅಧ್ಯಕ್ಷ ಸಿದ್ದನಗೌಡ ಜಾಲಿಹಾಳ, ಎಸ್.ಡಿ.ಎಮ್.ಸಿ ಸದಸ್ಯರಾದ ರಾಮಕೃಷ್ಣ ಬೆಳ್ಳಿಗುಂಡಿ, ಖಾಜಾಸಾಬ್, ಪಾಲಕ ಹುಲ್ಲೇಶ್, ಹೆಚ್ಚುವರಿ ಮುಖ್ಯಗುರುಗಳಾದ ಅಂಬಣ್ಣ, ಸೇರಿದಂತೆ ವಿದ್ಯಾರ್ಥಿಗಳು ಇದ್ದರು.