ತಾವರಗೇರಾ ಪಟ್ಟಣದ ಪೊಲೀಸ್ ಠಾಣೆಯ ಆವರಣ ಪಕ್ಕದಲ್ಲಿ ಬೇವಿನ ಮರದ ಕೊಂಬೆಯಲ್ಲಿ ಹಾಲಿನ ನೊರೆ ಬರುವುದನ್ನು ಕಂಡ ಸಾರ್ವಜನಿಕರು ಬೇವಿನ ಮರಕ್ಕೆ ವಿಶೇಷ ಪೂಜೆ ಸಲ್ಲಿಸಿ ಭಕ್ತಿಯಿಂದ ನಮಿಸುತ್ತಿದ್ದಾರೆ. ಮತ್ತೆ ಕೆಲವರು ಇದು ದೇವರ ಪ್ರಸಾದವೆಂದು ಹಾಲಿನ ನೊರೆಯನ್ನು ಕುಡಿಯುತ್ತಿದ್ದಾರೆ. ಇದಕ್ಕೆ ಮೂಲ ಕಾರಣ ವಾತಾವರಣದಲ್ಲಿ ತೇವಾಂಶ ಹೆಚ್ಚಾಗಿ ಕೆಲವೊಂದು ಮರದಲ್ಲಿ ಈರೀತಿಯಾಗುತ್ತದೆ ದಯವಿಟ್ಟು ಸಾರ್ವಜನಿಕರು ಬೇವಿನ ಮರದಲ್ಲಿ ಹಾಲಿನ ನೊರೆಯಾಗಿ ಬರುತ್ತಿರುವುದನ್ನು ಯಾರೂ ಸೇವಿಸಬಾರದು ಎಂದು ಪರಿಸರ ಪ್ರೇಮಿ,ವನಸಿರಿ ಪೌಂಡೇಷನ್ ಸದಸ್ಯ ಪರಿಸರ ರಕ್ಷಕ ಪ್ರಶಸ್ತಿ ಪುರಸ್ಕೃತ ಬಾಷಾವಲಿ ತಾವರಗೇರಾ ಅವರು ಸಾರ್ವಜನಿಕರಿಗೆ ಮನವಿ ಮಾಡಿದರು.
ಬೇವಿನ ಮರದಲ್ಲಿ ಹಾಲಿನ ನೊರೆ ಬರಲು ವೈಜ್ಞಾನಿಕ ಕಾರಣವೇನದರೆ
ನೈಸರ್ಗಿಕ ರಕ್ಷಣಾ ವ್ಯವಸ್ಥೆ ಮರದ ತೊಗಟೆಗೆ ಕೀಟಗಳು, ಶಿಲೀಂಧ್ರಗಳು ಅಥವಾ ಬ್ಯಾಕ್ಟೀರಿಯಾಗಳಿಂದ ಹಾನಿಯಾದಾಗ,ಗಾಯವನ್ನು ಗುಣಪಡಿಸಲು ಮತ್ತು ಸೂಕ್ಷ್ಮಜೀವಿಗಳ ದಾಳಿಯಿಂದ ರಕ್ಷಿಸಿಕೊಳ್ಳಲು ಮರವು ತನ್ನಿಂದ ತಾನೇ ಈ ರಸವನ್ನು ಸ್ರವಿಸುತ್ತದೆ. ಕೆಲವೊಮ್ಮೆ ‘ಅಗ್ರೋಬ್ಯಾಕ್ಟೀರಿಯಂ ಟ್ಯೂಮ್‌ಫೇಸಿಯನ್ಸ್’ ಎಂಬ ಬ್ಯಾಕ್ಟೀರಿಯಾ ಸೋಂಕಿನಿಂದಾಗಿ ಮರದ ಕಾಂಡದಲ್ಲಿ ಗಂಟುಗಳು ರೂಪುಗೊಳ್ಳುತ್ತವೆ.ವಾತಾವರಣದಲ್ಲಿ ತೇವಾಂಶ ಹೆಚ್ಚಾದಾಗ,ಈ ಗಂಟುಗಳ ಅಂಗಾಂಶಗಳು ದುರ್ಬಲಗೊಂಡು ಒಡೆದುಹೋಗುತ್ತವೆ,ಇದರಿಂದಾಗಿ ಒಳಗಿದ್ದ ದ್ರವವು ಹೊರಬರುತ್ತದೆ.
ಹಳೆಯ ಮರಗಳು ಕೆಲವೊಮ್ಮೆ ತಮ್ಮ ಅಂಗಾಂಶಗಳಲ್ಲಿ ಹೆಚ್ಚುವರಿ ನೀರನ್ನು ಸಂಗ್ರಹಿಸುತ್ತವೆ.ಆಂತರಿಕ ಒತ್ತಡ ಹೆಚ್ಚಾದಾಗ ಈ ನೀರು ನೊರೆಯ ರೂಪದಲ್ಲಿ ಹೊರಬರಬಹುದು.
ಈ ಬಿಳಿ ದ್ರವವನ್ನು ಕೆಲವೊಮ್ಮೆ ‘ನೀಮ್ ಟಾಡಿ’ (Neem Toddy) ಅಥವಾ ‘ನಿಂಬ ನೀರಾ’ ಎಂದೂ ಕರೆಯುತ್ತಾರೆ. ಇದು ಸಾಮಾನ್ಯವಾಗಿ ಹಳೆಯ ಮರಗಳ ಪ್ರಮುಖ ಕೊಂಬೆಗಳ ನಡುವಿನ ಕೋನದಿಂದ ಹೊರಬರುತ್ತದೆ.ಇದು ವಿಶಿಷ್ಟವಾದ ವಾಸನೆ ಮತ್ತು ಕಹಿ ರುಚಿಯನ್ನು ಹೊಂದಿರುತ್ತದೆ.
ಸ್ಥಳೀಯವಾಗಿ ಅನೇಕ ಜನರು ಈ ಘಟನೆಯನ್ನು ದೈವಿಕ ಪವಾಡವೆಂದು ನಂಬಿ ಮರಕ್ಕೆ ಪೂಜೆ ಸಲ್ಲಿಸುತ್ತಿದ್ದಾರೆ. ಆದರೆ ವಿಜ್ಞಾನಿಗಳ ಪ್ರಕಾರ ಇದು ಮರದ ಸಾಮಾನ್ಯ ಜೈವಿಕ ಕ್ರಿಯೆಯಾಗಿದೆ.
ಈ ದ್ರವವು ಬ್ಯಾಕ್ಟೀರಿಯಾಗಳು ಅಥವಾ ಇತರೆ ಸೂಕ್ಷ್ಮಜೀವಿಗಳನ್ನು ಹೊಂದಿರಬಹುದು.ಆದ್ದರಿಂದ, ರಾಸಾಯನಿಕ ಪರೀಕ್ಷೆ ಮತ್ತು ತಜ್ಞರ ಸಲಹೆಯಿಲ್ಲದೆ ಇದನ್ನು ಸೇವಿಸುವುದು ಹಾನಿಕಾರಕವಾಗಬಹುದು.ದಯವಿಟ್ಟು ಸಾರ್ವಜನಿಕರು ಬೇವಿನ ಮರದಲ್ಲಿ ಹಾಲಿನ ನೊರೆಯಾಗಿ ಬರುತ್ತಿರುವುದನ್ನು ಯಾರೂ ಸೇವಿಸಬಾರದು ಎಂದು ಸಾರ್ವಜನಿಕರಿಗೆ ಮನವಿ ಮಾಡಿದರು.
