ಮಸ್ಕಿ, ಏಪ್ರಿಲ್ 3: ವಿಶ್ವದ ದೂರದ ಯುದ್ಧದ ಘರ್ಷಣೆ, ಮಸ್ಕಿಯ ಮನೆಮನೆಗಳ ಅಡುಗೆಮನೆಗೆ ಬಂದು ನಿಂತಂತಾಗಿದೆ. ಇರಾನ್–ಇಸ್ರೇಲ್–ಅಮೇರಿಕಾ ನಡುವಿನ ಉದ್ವಿಗ್ನ ಪರಿಸ್ಥಿತಿ ಪರಿಣಾಮವಾಗಿ ಭಾರತದಲ್ಲಿ ಎಲ್ಪಿಜಿ (ದ್ರವೀಕೃತ ಪೆಟ್ರೋಲಿಯಂ ಅನಿಲ) ಪೂರೈಕೆ ತೀವ್ರವಾಗಿ ಕುಂಠಿತಗೊಂಡಿದ್ದು, ಮಸ್ಕಿ ಪಟ್ಟಣದಲ್ಲಿ ಅನಿಲ ಸಿಲಿಂಡರ್ ಕೊರತೆ ಉಂಟಾಗಿ ಜನಜೀವನ ಅಸ್ತವ್ಯಸ್ತವಾಗಿದೆ.
ಹಾರ್ಮುಜ್ ಜಲಸಂಧಿಯಲ್ಲಿ ಹಡಗುಗಳ ಸಂಚಾರಕ್ಕೆ ಅಡಚಣೆ ಉಂಟಾಗಿರುವ ಹಿನ್ನೆಲೆ, ಅನಿಲ ಆಮದು ಕಡಿಮೆಯಾಗಿ ದಾಸ್ತಾನುಗಳು ಕ್ಷೀಣಿಸುತ್ತಿವೆ. ಇದರ ಪರಿಣಾಮವಾಗಿ, ಮಸ್ಕಿಯ ಸರ್ಕಾರಿ ತೈಲ ಕಂಪನಿಗಳಾದ ಇಂಡಿಯನ್ ಗ್ಯಾಸ್ ದಿನಕ್ಕೆ ಕೇವಲ 45 ಸಿಲಿಂಡರ್ಗಳನ್ನು ಮಾತ್ರ ವಿತರಿಸುತ್ತಿದ್ದರೆ, HP ಗ್ಯಾಸ್ ಸುಮಾರು 325 ಸಿಲಿಂಡರ್ಗಳನ್ನು ನೀಡುತ್ತಿದ್ದುದು ಬೇಡಿಕೆಗೆ ಸರಿಹೊಂದುತ್ತಿಲ್ಲ.
ಬೆಳಗಿನ ಮುಂಜಾನೆ 5 ಗಂಟೆಯಿಂದಲೇ ಗ್ರಾಹಕರು ಸರದಿ ಸಾಲಿನಲ್ಲಿ ನಿಂತು ಸಿಲಿಂಡರ್ ಪಡೆಯಲು ಹೋರಾಟ ನಡೆಸುತ್ತಿರುವ ದೃಶ್ಯಗಳು ದಿನನಿತ್ಯದ ಕಥೆಯಾಗಿವೆ. ಅಡಿಗೆಮನೆಯ ಉರಿ ಇಂದಿಗೆ ಕಾದಾಟದ ಉರಿಯಾಗಿ ಬದಲಾಗಿರುವಂತಾಗಿದೆ.
ಹೋಟೆಲ್ ಮಾಲೀಕರ ಅಳಲು:
“ನಮ್ಮ ಬದುಕೇ ಹೋಟೆಲ್ ಮೇಲೆ ಅವಲಂಬಿತವಾಗಿದೆ. ಗ್ಯಾಸ್ ಕೊರತೆಯಿಂದ ಅಡುಗೆ ಮಾಡುವುದು ದುಸ್ತರವಾಗಿದೆ. ಕಟ್ಟಿಗೆಗಳಿಂದ ಅಡುಗೆ ಮಾಡಿದರೆ ಸಮಯ ಹೆಚ್ಚು ತೆಗೆದುಕೊಳ್ಳುತ್ತದೆ. ಗ್ರಾಹಕರ ಸೇವೆ ನೀಡಲು ಆಗುತ್ತಿಲ್ಲ. ವ್ಯಾಪಾರ ದಿನೇ ದಿನೇ ಕುಸಿಯುತ್ತಿದೆ,” ಎಂದು ಸ್ಥಳೀಯ ಹೋಟೆಲ್ ಮಾಲೀಕರು ತಮ್ಮ ನೋವನ್ನು ಹೊರಹಾಕಿದರು.
ಗ್ರಾಹಕರ ಸಂಕಷ್ಟ:
ಸಾಮಾನ್ಯ ಗ್ರಾಹಕರಿಗೂ ಇದೇ ಪರಿಸ್ಥಿತಿ. “ದಿನನಿತ್ಯದ ಅಡುಗೆಗೆ ಅನಿಲ ಸಿಗದೆ ಸಂಕಷ್ಟ ಅನುಭವಿಸುತ್ತಿದ್ದೇವೆ. ಸರ್ಕಾರ ತಕ್ಷಣ ಕ್ರಮ ಕೈಗೊಂಡು ಸಮಸ್ಯೆ ಪರಿಹರಿಸಬೇಕು,” ಎಂದು ಹಲವರು ಒತ್ತಾಯಿಸಿದರು.
ಈ ಅನಿಲ ಸಂಕಷ್ಟವು ಕೇವಲ ಪೂರೈಕೆಯ ಸಮಸ್ಯೆಯಾಗಿಲ್ಲ, ಅದು ಜನರ ಬದುಕಿನ ಹಗ್ಗವನ್ನು ಕಟ್ಟಿ ಹಿಡಿದಂತಾಗಿದೆ. ಸರ್ಕಾರ ತ್ವರಿತ ಕ್ರಮ ಕೈಗೊಂಡು ಪೂರೈಕೆಯನ್ನು ಸುಧಾರಿಸದಿದ್ದರೆ, ಮಸ್ಕಿಯ ಜನರ ಬದುಕು ಇನ್ನಷ್ಟು ಕಠಿಣವಾಗುವ ಸಾಧ್ಯತೆ ಇದೆ.
ವರದಿ: ಸುರೇಶ್ ಬಳಗಾನೂರು
