ಸಿರವಾರ.ನಂ.07- ಸಿಂಧನೂರು ತಾಲ್ಲೂಕಿನ ತಿಡಿಗೋಳ ಗ್ರಾಮದ ದಲಿತರ ಮೇಲೆ ದೌರ್ಜನ್ಯ ನಡೆಸಿ ಸಾಮಾಜಿಕ ಬಹಿಷ್ಕಾರ ಹಾಕಿದವರ ಮೇಲೆ ಕಾನೂನು ಕ್ರಮಕ್ಕೆ ಆಗ್ರಹಿಸಿ ಸಿಂಧನೂರಿನ ಪಿ.ಡಬ್ಲ್ಯು.ಡಿ ಕ್ಯಾಂಪ್‌ನ ಅಂಬೇಡ್ಕ‌ರ್ ಸರ್ಕಲ್‌ನಿಂದ ತಿಡಿಗೋಳವರೆಗೆ ಹಮ್ಮಿಕೊಂಡಿರುವ ಬೈಕ್ ರ್ಯಾಲಿಯಲ್ಲಿ ಸಿರವಾರ ತಾಲೂಕಿನಿಂದ ಸುಮಾರು 50ರಿಂದ 100 ಬೈಕ್ ಗಳ ಮೂಲಕ ರ್ಯಾಲಿಯಲ್ಲಿ ಭಾಗವಹಿಸಲಾಗುವುದು ಎಂದು ದಲಿತ ಮುಖಂಡ ಭಸವರಾಜ ಭಂಡಾರಿ ಹೇಳಿದರು.
ಪಟ್ಟಣದ ಪ್ರವಾಸಿ ಮಂದಿರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು
ಸಿಂಧನೂರು ತಾಲ್ಲೂಕಿನ ತಿಡಿಗೋಳ ಗ್ರಾಮದಲ್ಲಿ ದಿ. ಅಕ್ಟೋಬರ್ 18ರಂದು ನಡೆದ ಮಾರುತೇಶ್ವರ (ಆಂಜನೇಯ್ಯ) ಜಾತ್ರೆಯಲ್ಲಿ ಸವರ್ಣೀಯರು, ದಲಿತರ ಮೇಲೆ ಅಮಾನವೀಯವಾಗಿ ಹಲ್ಲೆ ನಡೆಸಿ, ಸಾಮಾಜಿಕ ಬಹಿಷ್ಕಾರ ಹಾಕಿರುವ ಘಟನೆಯು ಹೇಯಕೃತ್ಯವಾಗಿದ್ದು, ಸ್ವಾತಂತ್ರ್ಯ ಬಂದು 79 ವರ್ಷಗಳ ನಂತರವೂ ಇನ್ನೂ ಜಾತಿ ಮೌಡ್ಯ ಹಾಗೂ ಅಸ್ಪೃಶ್ಯತೆ ಜೀವಂತವಾಗಿರುವುದಕ್ಕೆ ಜ್ವಲಂತ ಸಾಕ್ಷಿಯಾಗಿದೆ. ಕಳೆದ ಕೆಲವು ತಿಂಗಳುಗಳಿಂದ ಜಿಲ್ಲೆಯಲ್ಲಿ ದಲಿತರ ಮೇಲೆ ನಡೆಯುತ್ತಿರುವ ದೌರ್ಜನ್ಯ, ಅತ್ಯಚಾರ ಕೊಲೆ ಮುಂತಾದ ಸರಣಿ ದುಷ್ಪಕೃತ್ಯಗಳ ಮುಂದುವರಿಕೆ ತಿಡಿಗೋಳದಲ್ಲಿ ನಡೆದಿದೆ. ದೌರ್ಜನ್ಯ ನಡೆದು ಎರಡು ವಾರ ಕಳೆದರೂ ಮಸ್ಕಿ ಕ್ಷೇತ್ರದ ಶಾಸಕ ಬಸನಗೌಡ ತುರ್ವಿಹಾಳ ಅವರು ಇದುವರೆಗೂ ಭೇಟಿ ಕೊಟ್ಟಿರುವುದಿಲ್ಲ ಹಾಗೂ ದೌರ್ಜನ್ಯ ಮಾಡಿದ ಮುಖ್ಯ ಆರೋಪಿಗಳನ್ನು ಇದುವರೆಗೂ ಬಂಧಿಸಿರುವುದಿಲ್ಲ. ಭಯದ ಕಾರಣದಿಂದಾಗಿ ದಲಿತರು ಗ್ರಾಮ ತೊರೆದಿದ್ದಾರೆ. ಪೋಲಿಸ್ ಇಲಾಖೆ ಮತ್ತು ಜಿಲ್ಲಾಡಳಿತ ಈ ದೌರ್ಜನ್ಯದ ಕುರಿತು ನಿರ್ಲಕ್ಷ್ಯ ವಹಿಸಿದೆ ಇದಕ್ಕೆ ಗೃಹ ಸಚಿವರ ತಾರತಮ್ಯ ಭಾವನೆಯನ್ನು ಸಮಾಜ ಖಂಡಿಸುತ್ತದೆ ಎಂದು ಹೇಳಿದರು.
ಎರಡು ದಿನಗಳ ಹಿಂದೆ ರಾಯಚೂರಿನ ಅಂಬೇಡ್ಕರ ಭವನದಲ್ಲಿ ಜರುಗಿದ ಪ.ಜಾ ಪ.ಪಂ ಕುಂದುಕೊರತೆ ಸಭೆಯಲ್ಲಿ ಜಿಲ್ಲಾಧಿಕಾರಿಗಳು, ಎಸ್ಪಿ, ಸಮಾಜ ಕಲ್ಯಾಣ ಅಧಿಕಾರಿಗಳು ವೇದಿಕೆಯ ಮೇಲೆ ದಲಿತ ಮುಖಂಡರು ಅವರ ಸಮಸ್ಯೆಯನ್ನು ಹೇಳಿಕೊಳ್ಳುವ ಸಮಯದಲ್ಲಿ ಅವರ ಅವಹಾಲುಗಳನ್ನು ಕೇಳದೇ ಹರಟೆ ಮಾಡುತ್ತಿರುವ ದೃಶ್ಯವನ್ನು ಖಂಡಿಸುತ್ತೇವೆ, ಕಾಟಾಚಾರಕ್ಕೆ ನಡೆದಿದೆ ಎಂದು ಆರೋಪಿಸಿದರು.
ವಿಜಯರಾಣಿ ಮಾತನಾಡಿದರು. ಈ ಸಂದರ್ಭದಲ್ಲಿ ಬಡ್ಡ ಹನುಮಂತ, ಸವಾರೆಪ್ಪ, ಸಾಮೇಲಪ್ಪ, ಮಲ್ಲಪ್ಪ ಕಜ್ಜಿ, ಅರಳಪ್ಪ ಯದ್ದಲದಿನ್ನಿ, ಮಲ್ಲಪ್ಪ ನಾರಬಂಡ, ಎಂ. ಮನೋಹರ, ದಾನಪ್ಪ, ಜಯಪ್ಪ ಗುತ್ತೆದಾರ್, ಗ್ಯಾನಪ್ಪ ಸೂಜಪ್ಪ, ಕರಿಯಪ್ಪ ತೋರಣದಿನ್ನಿ, ರಾಮಣ್ಣ ಮೇಸ್ತ್ರಿ, ಮೇಶಕ್ ಕೆಂಪು, ಯೇಸುಮಿತ್ರ ಮಚ್ಚಿ, ಮೌನೇಶ ಎಸ್.ಲಕ್ಷ್ಮಣ ಸೇರಿದಂತೆ ಇನ್ನಿತರರು ಇದರು.