ಕಂಪ್ಲಿ: ಮನಸ್ಸಿನ ಏಕಾಗ್ರತೆ, ದೇಹದ ದೃಢತೆ ಹಾಗೂ ನಿರಂತರ ಸಾಧನೆಯ ಛಲವಿದ್ದರೆ ಎಂತಹ ಶಿಖರವನ್ನಾದರೂ ಏರಬಹುದು ಎಂಬುದನ್ನು ಕಂಪ್ಲಿ ತಾಲೂಕಿನ ಹೆಮ್ಮೆಯ ಯೋಗ ಕುವರಿ, ಕುಮಾರಿ ಪೂರ್ವಿಕಾ ಜೆ. ಎಂ. ಅಕ್ಷರಶಃ ಸಾಬೀತುಪಡಿಸಿದ್ದಾರೆ. ಬೀದರ್ ಜಿಲ್ಲೆಯ ಎಸ್.ಆರ್.ಪಿ.ಯು. ಕಾಲೇಜಿನಲ್ಲಿ ಇತ್ತೀಚೆಗೆ ನಡೆದ ರಾಜ್ಯಮಟ್ಟದ ಯೋಗ ಸ್ಪರ್ಧೆಯಲ್ಲಿ ಎರಡು ವಿಭಾಗಗಳಲ್ಲಿ ವೀರಾವೇಶದ ಪ್ರದರ್ಶನ ನೀಡಿ, ‘ಎರಡು ಚಿನ್ನದ ಪದಕ’ಗಳನ್ನು ಮುಡಿಗೇರಿಸಿಕೊಳ್ಳುವ ಮೂಲಕ ರಾಷ್ಟ್ರಮಟ್ಟದ ಮಹಾ ವೇದಿಕೆಗೆ ಗರ್ಜಿಸುತ್ತಾ ಹೆಜ್ಜೆ ಇಟ್ಟಿದ್ದಾರೆ.
ಇವರು ಕಂಪ್ಲಿ ಪಟ್ಟಣದ ನಿವಾಸಿಗಳಾದ ಜೆ. ಎಂ. ತಿಪ್ಪೇಸ್ವಾಮಿ ಹಾಗೂ ಜೆ. ಎಂ. ಅಮೃತಾ ದಂಪತಿಯ ಪುತ್ರಿಯಾಗಿದ್ದು, ಎಸ್ ಎಸ್ ಎಲ್ ಸಿ ಪರೀಕ್ಷೆಯಲ್ಲಿ 94% ಶೇಕಡಾವಾರು ಫಲಿತಾಂಶ ಪಡೆದು, ಪ್ರಸ್ತುತ ಮೂಡುಬಿದ್ರೆಯ ಆಳ್ವಾಸ್ ಕಾಲೇಜಿನಲ್ಲಿ ಪ್ರಥಮ ಪಿಯುಸಿ ವ್ಯಾಸಂಗ ಮಾಡುತ್ತಿದ್ದಾಳೆ. ಕಂಪ್ಲಿ ಪಟ್ಟಣದ ಕುವರಿಯ ಹಿಮಾಲಯ ಸದೃಶ ಸಾಧನೆ ಇಡೀ ಬಳ್ಳಾರಿ ಜಿಲ್ಲೆ ಹಾಗೂ ಕರ್ನಾಟಕವೇ ತಿರುಗಿ ನೋಡುವಂತೆ ಮಾಡಿದೆ.
ಖಚಿತ ಗುರಿ, ಅಚಲ ನಂಬಿಕೆ – ಯುವ ಪೀಳಿಗೆಗೆ *ಸ್ಫೂರ್ತಿಯ ಸೆಲೆ:*
ಯಾವುದೇ ದೊಡ್ಡ ಸಾಧನೆಗೆ ಸೌಲಭ್ಯಗಳಿಗಿಂತ ಹೆಚ್ಚಾಗಿ ಒಳಗಣ್ಣಿನ ಕನಸು ಮತ್ತು ಮುರಿಯದ ಸಂಕಲ್ಪ ಮುಖ್ಯ ಎಂಬುದಕ್ಕೆ ಪೂರ್ವಿಕಾ ಜೆ. ಎಂ. ಅವರೇ ಸಾಕ್ಷಿ. ನಿತ್ಯದ ಕಠಿಣ ಪರಿಶ್ರಮ, ಬೆವರು ಹರಿಸುವ ಜಪ ಹಾಗೂ ಯೋಗದ ಮೇಲಿನ ಅಚಲ ಭಕ್ತಿಯೇ ಇಂದು ಅವರನ್ನು ರಾಜ್ಯಮಟ್ಟದ ಸಿಂಹಾಸನದಲ್ಲಿ ಕೂರಿಸಿದೆ. ಸೋಲು-ಗೆಲುವುಗಳ ಲೆಕ್ಕಾಚಾರ ಬದಿಗಿಟ್ಟು ಕೇವಲ ಪರಿಶ್ರಮವನ್ನೇ ಉಸಿರಾಗಿಸಿಕೊಂಡರೆ ಯಶಸ್ಸು ನಮ್ಮ ಪಾದದಡಿಗೆ ಬರುತ್ತದೆ ಎಂಬುದನ್ನು ಪೂರ್ವಿಕಾ ಜೆ. ಎಂ.ಇಂದಿನ ಯುವ ಪೀಳಿಗೆಗೆ ಮನದಟ್ಟು ಮಾಡಿಕೊಟ್ಟಿದ್ದಾರೆ. ಇವರ ಈ ಯಶೋಗಾಥೆ ಗ್ರಾಮೀಣ ಭಾಗದ ಸಾವಿರಾರು ಉದಯೋನ್ಮುಖ ಪ್ರತಿಭೆಗಳಿಗೆ ದಾರಿದೀಪವಾಗಿದೆ.
ಪೂರ್ವಿಕಾ ಅವರ ಈ ಐತಿಹಾಸಿಕ ಸಾಧನೆ ಕಂಪ್ಲಿ ಪಟ್ಟಣದಲ್ಲಿ ಹಬ್ಬದ ಸಡಗರ ಮೂಡಿಸಿದೆ. ಪೂರ್ವಿಕಾ ಅವರ ಕುಟುಂಬ ವರ್ಗದ ಶಕ್ತಿಸ್ತಂಭ ಹಿರಿಯರಾದ ಜೆ. ಎಂ. ಸಿದ್ದಯ್ಯ ಸ್ವಾಮಿ, ನಿರ್ಮಲ ಕೊಡಲಿಕರ್, ಹಾಗೂ ಅವರ ಇಡೀ ಕುಟುಂಬ ವರ್ಗದವರು ಮತ್ತು ಕಂಪ್ಲಿ ಪಟ್ಟಣದ ಪ್ರಮುಖ ಸಂಘಟನೆಗಳ ಪದಾಧಿಕಾರಿಗಳು ಸಾಧಕಿಯನ್ನು ಅತ್ಯಂತ ಸಡಗರದಿಂದ ಸ್ವಾಗತಿಸಿ, ಸಿಹಿ ಹಂಚಿ ಹೃತ್ಪೂರ್ವಕವಾಗಿ ಸನ್ಮಾನಿಸಿದರು.
*”ಅಖಂಡ ಭಾರತದ ನಕ್ಷೆಯಲ್ಲಿ ಕಂಪ್ಲಿಯ ಹೆಸರು ಬೆಳಗಲಿ”:*
“ಪೂರ್ವಿಕಾ ಕೇವಲ ನಮ್ಮ ಕುಟುಂಬದ ಹೆಮ್ಮೆಯಲ್ಲ, ಇಡೀ ನಾಡಿನ ಹೆಮ್ಮೆಯ ಸಂಕೇತ. ಆಕೆಯ ಈ ಚಿನ್ನದ ಸಾಧನೆ ಮುಂಬರುವ ರಾಷ್ಟ್ರಮಟ್ಟದ ಸ್ಪರ್ಧೆಯಲ್ಲೂ ಮುಂದುವರಿದು, ದೇಶದ ನಕ್ಷೆಯಲ್ಲಿ ಕಂಪ್ಲಿಯ ಹೆಸರು ಸುವರ್ಣಾಕ್ಷರಗಳಲ್ಲಿ ಮೂಡಿಬರಲಿ, ಆಕೆ ಭಾರತದ ಕೀರ್ತಿಪತಾಕೆಯನ್ನು ಹಾರಿಸಲಿ” ಎಂದು ಜಿ. ಎಂ. ಸಿದ್ದಯ್ಯ ಸ್ವಾಮಿ ಹಾಗೂ ಪಟ್ಟಣದ ಪ್ರಮುಖ ಸಂಘಟನೆಗಳ ಗಣ್ಯರು ರೋಮಾಂಚನದಿಂದ ಆಶೀರ್ವದಿಸಿ, ಶುಭ ಹಾರೈಸಿದ್ದಾರೆ.
ಕನಸುಗಳನ್ನು ಕಾಣುವ ಧೈರ್ಯ ನಿಮಗಿದ್ದರೆ, ಅದನ್ನು ನನಸು ಮಾಡುವ ಶಕ್ತಿ ನಿಮ್ಮ ಕಠಿಣ ಪರಿಶ್ರಮಕ್ಕಿರುತ್ತದೆ. ಪೂರ್ವಿಕಾ ಅವರ ಈ ಹಾದಿ ನಮಗೆ ಕಲಿಸುವುದು ಒಂದೇ – ಪ್ರಯತ್ನ ನಿರಂತರವಾಗಿರಲಿ, ಯಶಸ್ಸು ನಿಶ್ಚಿತ.